Casa d'Austria

Casa d'Austria ye'l nome col que se conoz a la dinastía Habsburgu reinante na Monarquía Hispánica nos sieglos xvi y xvii; dende la proclamación como rei de Carlos I en 1516, hasta la muerte ensin socesión direuta de Carlos II, que provocó la Guerra de Socesión española.

La Monarquía Hispánica —o Monarquía Católica— foi mientres toa esa dómina la mayor potencia d'Europa. Mientres los llamaos Austrias mayores —Carlos I y Felipe II—, algamó l'apoxéu de la so influencia y poder. L'heriedu territorial de Carlos I, procedente de los Habsburgu —Países Baxos y Condáu de Borgoña en 1506— y de los Trastámaras —Corones d'Aragón y Castiella en 1516—, xunto cola conquista d'América, conformó la base de lo que se conoz como Imperiu español.

Sicasí, los reinaos de los llamaos Austrias menores —Felipe III, Felipe IV y Carlos II—, coincidentes colo meyor del Sieglu d'Oru de les artes y les lletres, significaron la decadencia española»: la perda de la hexemonía europea y una fonda crisis económica y social. Na segunda metá del sieglu xvi, los españoles fueron sustituyíos na hexemonía europea pola Francia de Lluis XIV.